अक्टोबरमा कोरोनाको तेस्रो लहर आउने

एजेन्सी - स्वास्थ्य विशेषज्ञको टोलीले भारतमा आगामी अक्टोबरमा कोभिड–१९को तेस्रो लहर आउने अनुमान गरेको छ । समाचार संस्था रोयटर्सकाअनुसार, यो लहरले दोस्रो लहर जति भयावह रूप नलिने पनि विशेषज्ञ टोलीको अनुमान रहेकाे बताएकाे छ ।

तेस्रो लहरलाई नियन्त्रण गर्न सकिने टोलीको ठहर छ । तर, विशेषज्ञको टोलीले महामारी आगामी एक वर्षसम्म पनि खतरनाक रहने उल्लेख गरेको छ । ४० स्वास्थ्य विशेषज्ञको टोलीबीच गरिएको अनुसन्धानमा खोपका कारण आगामी संक्रमणलाई भयावह हुनबाट रोक्ने बताइएको छ । 

अनुसन्धानमा सहभागी ८५ प्रतिशत विशेषज्ञले आगामी लहर अक्टोबरमा आउने बताएपनि तीन विशेषज्ञले भने महामारीको लहर अगस्टको शुरूवातदेखि नै आउनसक्ने अनुमान गरेका छन् । अरु तीन विशेषज्ञले भने तेस्रो लहर नोभेम्बरदेखि फेब्रुअरीसम्ममा आउने बताएका छन् । 

आशातित कुरा यो छ कि, ७० प्रतिशत विशेषज्ञले अब आउने जुनसुकै लहरले पनि पहिलेजति असर नपुर्याउने बताएका छन् । एम्सका निर्देशक डा. रणदीप गुलेरिया भन्टन्, ‘अबको लहर नियन्त्रित हुनेछ र यसले कममात्रै असर पुर्याउने छ । किनकि त्यतिन्जेलसम्म धेरैले खोप लगाइसकेका हुनेछन् । त्यस्तै दोस्रो लहरबाट धेरैमा प्राकृतिक इम्युनिटी पनि आइसकेको हुनेछ ।’

केही विशेषज्ञले अब आउने लहरले १८ वर्षमूनिकालाई बढी प्रभावित पार्न बताएका छन् ।