सोमबार अमेरिकाबाट १५ लाख डोज कोरोना खोप आउने

काठमाडौँ — अमेरिकाबाट सोमबार १५ लाख डोज कोरोना खोप आउने भएको छ । अमेरिकाले नेपाललाई निःशुल्क उपलब्ध गराउन लागेको जोन्सन एन्ड जोन्सन खोप सोमबार नेपाल भित्रिन लागेको हो । 

खोप सोमबार नेपाल आइपुग्ने प्रधानमन्त्रीका पराष्ट्र मामिला सल्लाहकार राजन भट्टराईले जानकारी दिए । अमेरिकाले कोभ्यासमार्फत नेपाललाई उक्त खोप सहयोग गर्न लागेको भट्टराईले जनाए ।

नेपालस्थित अमेरिकी राजदूतावासकी प्रवक्ता आना रिची–एलेनले शुक्रबार उक्त खोप नेपालमा आउने जानकारी दिएकी थिइन् । नेपालले यस अघिदेखि नै अमेरिकालाई खोप सहयोगको लागि आग्रह गर्दै आइरहेको थियो । साथै, नेपालकी राष्ट्रपति विद्यादेवी भण्डारीले नेपाललाई खोप सहयोगको लागि अमेरिकी राष्ट्रपति जो बाइडेनलाई पत्र लेखेकी थिइन् ।