पुनः ७ दिन थपियो लकडाउन, निजी सवारी चलाउन तथा पसल खोल्न पाइने

काठमाडौँ – उपत्यकामा जारी लकडाउन पुनः एक साता थपिएको छ । काठमाडौँ, ललितपुर र भक्तपुर जिल्लाका प्रमुख जिल्ला अधिकारीको आइतबार बसेको बैठकले निषेधाज्ञा एक साता थप्ने निर्णय गरेको हो ।

यसपटक थपिएको निषेधाज्ञा भने थप खुकुलो पारिएको छ । लकडाउनको यो अवधिमा निजी सवारी साधन जोर विजोर प्रणालीमा चलाउन पाइने भएको छ । त्यस्तै बार अनुसार पसल सञ्चालन गर्न पाइने भएको छ । त्यस्तै ट्याक्सी पनि जोर विजोर प्रणालीमा चल्न पाउनेछन् । तर अरु सार्वजनिक सवारी साधन भने चलाउन पाइने छैन ।

जारी निषेधाज्ञा सोमबार मध्यरात सकिनेछ । त्यसपछि मंगलबार असार ८ गतेदेखि लागू हुने नयाँ एक हप्ते निषेधाज्ञामा कपडा पसल, भाडा पसल लगायत भीडभाड कम हुने व्यवसाय प्रशासनद्वारा निर्धारित समयअवधि बमोजिम सञ्चालन गर्न पाइने भएको छ ।